Шансите за пласман во следната фаза се загубени, но тоа нема да ја намали мотивацијата кај избраниците на тренерот Кирил Лазаров. Напротив, тие се желни да покажат дека заслужуваат да играат во вака силна конкуренција.
– Нѐ очекува голем предизвик во дуелот со Војводина. Станува збор за сериозен противник, но ние сме подготвени и мотивирани да дадеме сѐ од себе во Нови Сад и да се надигруваме со еминентниот ривал, вели голманот на „фармацевтите“, Иван Галевски.
Дека Алкалоид не е наивен ривал покажуваат и зборовите на тренерот на Војводина, Борис Ројевиќ.
– Овие натпревари се најтешки, затоа што сите очекуваат победа, а противникот нималку не е наивен. Се надевам дека и публиката ќе го препознае моментот дека ни е потребен ветер во грб, затоа што против Алкалоид нема воопшто да биде лесно. Тоа е добар тим, имаат одлични играчи и мораме да бидеме максимално во мечот од прв до последен момент, изјави Ројевиќ.
