Македонија денеска слави голем ден. Денот кога пред 32 години над 95 проценти од граѓаните на референдум се изјаснија за самостојна и суверена држава – МАКЕДОНИЈА. Тогаш се оствари сонот на многуте претходни генерации кои и животи даваа за конечно осамостојување.
Голем празник.
Но, утрово Скопје е некако тивко, нема некоја празнична атмосфера… Зошто? Властите не направија празникот да изгледа посвечен или на граѓаните не им е до славење?
За ова ги прашавме скопјани кои утрово се движеа околу пазарот во Аеродром:
– Немам што да честитам и славам. Политичарите ја срозаа независноста на земјата. Кој што сака ни наметнува и наредува, а нашиве послушници прифаќаат. Па каде е тука независноста?, ни вели еден постар аеродромец.
-Македонија стана супер зависна, не е независна држава. Знаме и сменија странци, име и сменија странци, устав и менуваат трети странци, историја ни менуват комшии сосе наши „странци“ и вие ми велите зошто нема атмосфера? Што да славам? Ќе славам кога полека – полека пак ќе си ја вратиме независноста и како држава и како македонски народ, ни истакна средовечна жена.
-Власта го умртвува славењето. Не гледате ли дека се плашат „Македонија“ да споменат во говорите? Опозицијата исто е млака и парадерска, истакна друг аеродромец.
-Не се слави поради сиромаштијата. Народот е утепан, нема пари, се плаши за иднината на своите деца. Разочарани се. На прослави одат само партиски војници и функционерите, ни вели еден од тезгаџиите на пазарот.
Инаку, под мотото „Гласник на слободата“ денеска со повеќе активности, во организација на Владата, ќе се одбележува Денот на независноста на Македонија – 8 Септември.
Како дел од одбележувањето на Денот на Независноста, во организација на Владата, покрај многубројните пригодни манифестации, за граѓаните, од 11:00 часот во целата држава, ќе почне културната манифестација „Отворен ден за граѓаните“, во чии рамки ќе се обезбеди бесплатен влез за граѓаните во културните установи, музеи и галерии во целата Република.
Колку од граѓаните ќе ги посетат овие места каде можe да се види делови од македонската историја не е извесно. Историјата и нејзиното распродавање веќе подолг период е болна тема во земјава.
Сепак, честит празник и без разочарување да ја крепиме и враќаме независноста на Македонија.