МВР и министерот Оливер Спасовски не опструираат во вршењето на нашата работа за отстранување на непрописно паркирани возила по Скопје, истакна вчера директорот на ЈП „Градски паркинг“ Бојан Христовски. Тој зборуваше на седница на Советот на Град Скопје на чиј дневен ред беше и Предлог одлука за давање согласност за усвојување на годишната сметка на ЈП Градски Паркинг – Скопје за 2021 година.
Христовски потенцираше дека, во изминатиов период неколку пати реагира за овој проблем, а освен тоа се одржуваат комуникации и средби со МВР за надминување на истиот – сепак тој уште не е решен и опструкциите и понатаму траат.
-Морам да истакнам дека правиме обиди и напори за подобрување или воопшто воспоставување на соработка со МВР, со цел на дневно ниво да се отстрануваат непрописно паркираните возила од коловозите, коишто ја загрозуваат безбедноста во сообраќајот во Скопје. Сега за сега немаме никакви реакции, се’ уште се подигнуваат многу мал број на возила од тротоарите, пешачките зони, места каде што може да поминуваат лица со посебни потребни и слично, одговори Христовски.
Освен ова, тој истакна дека постојано се контактираат министерот Оливер Спасовски како и другите одговорни функционери за овој проблем, меѓутоа немало одговор.
-Еднаш или два пати неделно писмено се обраќаме до министерот за внатрешни работи, Оливер Спасовски, до директорот за јавна безбедност Сашо Тасевски и началникот на СВР Скопје, Тони Јакимовски, на коишто постојано им укажуваме на реакциите кои секојдневно пристигнуваат до нашето претпријатие од трети лица, граѓани или правни субјекти коишто се жалат на непостапувањето од страна на МВР, односно пријавуваат на бројот 192 кадешто ги известуваат за непрописно паркираните возила, чиешто постапување за отстранување е во ингеренции на МВР, но од страна на министерството нема реакција. Ние ќе продолжиме со нашите барања, како и јавно и институционално да ги повикуваме да си ја вршат својата работа, нагласи Христовски.
