Верниците од исламска вероисповед рано изутринава го започнаа Рамазанскиот пост, кој трае 29 дена и завршува на 20 март. Во текот на постот, од изгрејсонце до зајдисонце, верниците се воздржуваат од јадење и пиење.
Според исламското учење, Рамазан е месецот во кој првите стихови од Куранот му биле објавени на пророкот Мухамед пред повеќе од 1.400 години. Постот е еден од петте столба на исламот и претставува верска обврска за физичко и духовно прочистување.
За време на Рамазан, верниците не се воздржуваат само од храна и пијалаци, туку и од лоши зборови и дела, со цел морално и духовно издигнување. Постот е задолжителен за секој полнолетен и здрав муслиман, додека од обврската се изземени болните, бремените жени и лицата кои вршат тешка физичка работа.
По завршувањето на постот, на 20 март започнува Рамазан Бајрам, кој се празнува три дена. Празникот традиционално се одбележува со семејни собири, празнична трпеза и посети на роднини и пријатели. Рамазан е деветтиот месец од исламскиот календар.
Првиот ден од Рамазан Бајрам е државен празник, па 20 март (петок) ќе биде неработен ден за сите граѓани.
