Поранешниот американски претседател Доналд Трамп соопшти дека постигнал нов договор за прекин на непријателствата меѓу Тајланд и Камбоџа, по најновата ескалација во која загинаа десетици лица од двете страни.
Трамп потсети дека претходно учествувал во постигнувањето на мировен договор меѓу двете земји, но дека односите повторно се влошиле по инцидент во кој експлозија покрај пат усмртила и повредила повеќе тајландски војници.
„Утрово имав многу добар разговор со премиерот на Тајланд, Анутин Чарнвиракула, и премиерот на Камбоџа, Хун Сен, во врска со многу несреќното продолжување на нивната долготрајна војна. Тие се согласија да ги прекинат сите непријателства почнувајќи од вечерва и да се вратат на оригиналниот мировен договор што го постигнавме јас, тие и, со помош на големиот премиер на Малезија, Анвар Ибрахим“, напиша Трамп на TruthSocial.
Тој изјави дека експлозијата што го предизвикала последниот судир била „несреќа“, но дека Тајланд одговорил „многу силно“. Според него, двете земји се подготвени да се вратат на мир и да ја продолжат трговската соработка со САД.
„Чест ми е да соработувам со Анутин и Хун за решавање на ситуација што можеше да ескалира во голема војна меѓу две инаку прекрасни и просперитетни земји. Исто така, сакам да му се заблагодарам на премиерот на Малезија, Анвар Ибрахим, за неговата помош по ова многу важно прашање“, додаде Трамп.
