Во поликлиниката во Ѓорче Петров од утринава почнало тестирање на граѓаните со брзи тестови за корона вирусот. Првите пациенти веќе ги примиле резултатите од тестирањето, по што оние граѓани кои ќе излезат со позитивен резултат нема да имаат потреба да прават дополнителен ПЦР-тест. Но, оние граѓани чиј тест ќе излезе негативен, но имаат симптоми ќе бидат упатувани да прават ПЦР-тест. Ова тестирање чини 1.000 денари бидејќи тестовите биле набавени преку тендер.
Од управата на поликлиника изјавија дена интересот за брзото тестирање е огромен и први слободни термини има за неколку дена. Директорот на Здравствениот дом Скопје минатата недела најави дека граѓаните закажувањето за тестирање ќе треба да го извршат на телефон 2041-625. Нашиот денешен обид на овој телефон да добиеме информации за први слободни термини остана безуспешен бидејќи линијата беше постојано зафатена.
Денеска треба да пристигне донација од 13.000 брзи тестови, кои се најнова технологија, со која за 15 минути се утврдува дали кај тестираниот е присутен вирусот Ковид-19. Тестовите ќе бидат дистрибуирани по сите пунктови каде се врши тестирањето. Здравствените власти изјавија дека овие тестови нема да се наплатуваат од граѓаните.
