Историјата уште е главна тема во бугарската политика. Најново е дека кирилицата веќе не е словенско туку бугарското писмо направено од Кирил и Методиј. Ова „сознание“ веќе е предлог кој во прва фаза помина во бугарскиот парламент.
Бугарското Собрание со 73 гласа за, 4 против и 34 воздржани, вчера го усвои во прво читање, предлогот на коалицијата Обединети патриоти предводена од ВМРО-БНД на вицепремиерот и министер за одбрана Красимир Каракачанов, која е дел од владата на Бојко Борисов, за преименување празникот 24 Мај од „Ден на бугарската просвета и култура и на словенското писмо“ во „Ден на бугарската литература, образование и култура“.
Според предлагачите, ова е прв чекор кон признавање на кирилицата од страна на ЕУ како бугарска азбука.
– Бугарската писменост е идентична со кирилицата, создадена и раширена меѓу другите словенски народи токму од Бугарија. Основата на државноста на бугарскиот дух е токму бугарското писмо, образложи пред бугарските пратеници историчарот Милен Михов од ВМРО.
И неговиот сопартиец Красимир Богданов смета дека „кирилицата е чисто бугарска творба, создадена од Климент Охридски, во бугарска држава, за време на бугарските средновековни кралеви“, и повика на широка национална поддршка на овој предлог.
Формулацијата „празник на словенското писмо“, според Обединети патриоти, била измислена од Комунистичката партија на Бугарија пред 30 години.
Предлогот во прво читање доби поддршка од пратениците на владејачката ГЕРБ на Бојко Борисов, а против беа опозициските БСП и ДПС.
