Вкупно 20 пожари на различни локации во земјава имало во текот на викендов, соопшти денеска Центарот за управување со кризи (ЦУК). Во саботата имало шест, а вчера дури 14 пожари и една лажна дојава за пожар на отворен простор во државата. Пожарникарите сите ги изгаснале. Активни пожари, утрово, нема.
Во пожарите гореле стрништа, сува трева, депонија, ниска вегетација и гранки од сеча, биле во општините: Велес, кај село Иванковци; Валандово, кај с.Марвинци; Струмица, кај с.Баница; Кичево, кај с.Осломеј; Неготино, кај месноста „Чоркова Чешма“; Кривогаштани, кај пречистителната станица на излезот кон Прилеп; Старо Нагоричани, кај истоименото с.Старо Нагоричани; Штип, во месноста „Мирјанина Црква“; Тетово два пожара, кај с.Теарце(ниска вегетација) и кај с.Ратае и во Општина Куманово имало четири пожари, кај с.Речица, с.Оризаре, с.Горно Коњаре и кај с.Пчиња.
