Издавачката куќа „Панили“ од Скопје ја објави книгата со кратки раскази „Додека трае убавината“ од Јован Стрезовски. На страниците од своето најново дело, писателот застапува сто и триесет текстови, поделени во седум тематски целини.
Во мотото на книгата се вели дека убавината е во секое нешто, само треба да се има очи за неа таа да се види и доживее. Боцките на дивата ружа израснуваат да го штитат цветот, но и за да го боцнат оној што минува крај цветот без да ја забележи неговата убавина.
– Кратките раскази на Јован Стрезовски можеме да ги прифатиме и како песни во проза, со силни и синтетизирани емоционални пораки. Тие се еластична, флексибилна форма која инкорпорира и други жанрови и естетски облици во своето јадро. Напишани се со богата и повеќеслојна, метафорична и експресивна лексика, истакнуваат од „Панили“.
Автор е на книгите поезија: „Свет во свет“, „Шепоти“, „Велебилје“, „Орфеј на бескрајот“, „Блик“; на книгите поезија за деца „Светулки“, „Шарени песни“, „Шарено огледало“, „Од Северен до Јужен Пол„ и други; на романите „Вода“, „Свето проклето“, „Зарек“, „Злодобро“, „Еретик“, „Животраг“, „Последно прибежиште“, „Јанѕа“, „Завет“ и на романите за деца „Патот до зората“, „Братско стебло“, „Синови“, „Саатот кукавица“. Ги објавил и книгите раскази за деца „Последниот фишек“, „Зелени очила“, како и повеќе книги раскази за возрасни.