Се потврдуваат сомнежите дека Владата подготвува ново велепредавство во преговрите со Бугарија, обвини денеска партијата Левица. Во партиското соопштение оваа опозициска партија потенцира дека тоа се прави зад затворени врати.
-Преговорите со Бугарија веќе подолго време се водат зад грбот на јавноста. За работата на историската комисија, за тоа што се преговара, што е договорено и какви отстапки прави македонската страна, информации нема ниту за јавноста, ниту за пратениците. Ваквата констелација на нештата, само ги потврдува сомнежите дека Владата предводена од ДУИ и СДСМ подготвуваат ново велепредавство на македонскиот народ и држава. Овој пат зад затворени врати, вели Левица.
Во соопштението се наведува дека ова го потврди и Министерот Бујар Османи, кој јавно изјави дека има изготвено документ кој Македонија е спремна да го прифати, но дека се чека одговор од бугарската страна.
-Ако се земе во предвид и за тоа дека веќе неколку членови од Историската комисија поднесоа оставки, веројатно Владата го спрема последниот чин од нејзиниот процес на демакедонизација. Недостапноста на овој документ, прифатлив за Владата на ДУИ и СДСМ, покрај тоа што најавува ново велепредавство, укажува и на спремноста од нивна страна истиот да го протуркаат што е можно потивко и што е можно поскоро, за да се избегне негодувањето и притисокот од јавноста, нагласуваат од Левица.
Во партискиот став се додава дека уште позагрижувачки е фактот што лидерот на ВМРО-ДПМНЕ најави спремност да разговараат во насока на нова промена на македонскиот Устав.
-Очигледно е, политиката која ја води владејачката елита и барањата кои ги има народот целосно се спротивставени. Левица речиси цела година повикува на прекин на преговорите под покровителство на Вашингтон и Брисел кои ги води нелегитимната Влада. Ново национално велепредавство, не смее, не може и нема да помине, се вели во соопштението.
