Втор ден градоначалникот на Аеродром, Златко Марин, молчи за бројките и обвинувањата што против него ги извади поранешниот директор на салата „Борис Трајковски“ Златко Перински. Имено Перински вчера преку сликовити графикони објавени на неговиот Фејсбук-профил објасни дека во Аеродром ќе се гради како во 4 општини заедно.
-Центар, Гази Баба, Карпош и Ѓорче Петров или скоро половина од новите станови во цело Скопје се градат само во #ОпштинаАеродром. Новите згради за жителите на Аеродром значат бетон, а за општината и Марин свежи пари, но главното прашање е што се изгради од страна на општината со бетонизирањето на Аеродром? Одговорот е очигледен, НИШТО. Граѓаните и натаму не гледаат ништо од парите кои се слеваат во општинската каса, и понатаму Аеродром е неславен рекордер по загадување, по сообраќајниот метеж и сега по урбаното дивеење и бетонизирање на општината. Срамота!!!, пишува Перински.
Бројките од графиконите покажуваат дека само во 10 месеци од 2020 година Марин одобрил 1155 станови или повеќе од 63.168 метри квадратни станбен простор – нов.
-Ова значи дека во Аеродром, наместо урбанизирање, се случува бетонизирање на површина од околу 7 нови професионални фудбалски терени, пишува тој.
Од кабинетот на Марин, молк. Единствено се пофалија дека ја раззелениле дивата депонија кај Мичурин, претворајќи ја во парк и детско игралиште. Прашањето е ако е сето ова вистина, како воопшто ќе биде возможна борба со загадениот воздух, кога населбата не може да дише од згради? 
