Министерството за правда во овој момент ги подготвува сите документи за да го поднесе барањето за екстрадиција на Игор Спасов, кој по 15 месечно бегство, вчера беше уапсен во Софија.
Од Министерството за правда велат дека целата процедура не би требало да трае повеќе од две недели.
И штипскиот суд, каде Спасов ја издржуваше 14-годишната затворска казна за убиството на Мартин Нешкоски во 2011 година, и кој му го одобри здравственото отсуство, ги собира сите документи за екстрадицијата.
-Ако лицето е во притвор државата има рок од 40 дена за поднесување барање за екстрадиција, но веруваме дека во следните денови ќе ги прибираме потребните документи и до бугарските власти ќе поднесеме барања за екстрација на лицето Игор Спасов, велат од Министерството за правда.
Според извештајите на бугарските медиуми Спасов бил уапсен вчера околу 15 часот во населбата „Младост“ во Софија по пријава за семејно насилство.
