Во понеделник ќе започне првата фаза од реконструкцијата на една од најпрометните улици во Општина Центар, но и во Скопје, улицата „Орце Николов“, најави денеска преку социјалните мрежи градоначалникот Саша Богдановиќ.
Тој објави дека реконструкцијата е поделена во шест фази и ќе се одвива по целата должина на улицата која е под надлежност на општината, на потегот од раскрсницата со бул.
„Св.
Климент Охридски“ до раскрсницата со улицата „Франклин Рузвелт“.
Овој зафат ќе ја опфати целата површина од 7.182 метри квадратни и доколку сѐ се одвива согласно проектот, градежните активности ќе завршат во месец јули.
– Со реконструкцијата ќе се даде поголем приоритет на пешаците, со тоа што ќе се стимулираат пешачките токови и ќе се зголеми безбедноста при нивното движење по цела должина на улицата. Ќе се воведат велосипедски ленти кои ќе овозможат поврзување на велосипедистите и корисниците на алтернативни средства за транспорт, со останатите велосипедски патеки кои веќе постојат или се предвидени, наведе Богдановиќ.
