Старата скопска чаршија со векови била украс на градот. Но, дали во последниве децении тој украс доволно се чува?
Ако на ова одговорат последните неколку градоначалници и министри сите би рекле – да, многу ја чуваме чаршијата. Еве вчера министерот за култура, Зоран Љутков, и градоначалникот на Чаир, Изет Меџити, почнаа реконструкција на една тамошна улица. Велат целта била да го вратат сјајот на еден од најавтентичните урбани простори во Скопје.
И порано вакви помпезни најави и реконструкции во чаршијата имаше, но ако само кратко се прошета по тамошните сокаци се гледа дека чаршијата не се чува доволно. Не е проблемот само во потребата да се поправи калдрмата на некоја уличка. Старите градби слабо се одржуваат, а некои и се паднати и така стојат нагрдувајќи ја чаршијата. Воедно, се почесто кој што сака и каде сака доградува или руши. Во 2022 година беше срушен дури и објект под надлежност на Управата за културно наследство и таму се градеше без дозвола.
Ете тоа е проблемот на чаршијата. Џабе средување една уличка, ако на неа има модерни градби и излози кои воопшто не припаѓаат на автентичноста на чаршијата.
Како тргнала работата Старата скопска чаршија – нова ќе ја направат. Е тоа треба да се спречи.
