Џиновската тиква, која го доби името Мајкл Џордан, го собори рекордот за најтешка во светот и на својот сопственик Тревис Џинџер му донесе награда од 30.000 долари. Победничката тиква на Џинџер, учител по хортикултура од Минесота, тежи 1.250 килограми, што е за 21 килограм повеќе од претходниот рекордер.
„Добро е чувството“, рече Џинџер на Светското првенство во мерење тикви во Калифорнија. Тој вели дека тиквата толку пораснала затоа што ја наводнувал и до 12 пати на ден.
Џинџер на 10 април засадил тиква во Минесота и потрошил околу 15.000 долари за нејзино одгледување, пишува „sfejt.com“.
43-годишниот Џинџер одгледува тикви уште од тинејџерските години и три пати го освојувал првенството во Калифорнија.
Ова интересно натпреварување започна во 1974 година за забава, во Сирклвил, Охајо и Халф Мун Беј, Калифорнија – два града кои се прогласени за престолнини на тиквата во светот.
– Овогодинешната победничка тиква го носи името Мајкл Џордан, најдобриот кошаркар на сите времиња, бидејќи таа е најдобрата тиква на сите времиња досега, рече Џинџер.
Тој додаде дека на почетокот тиквата личела на баскет, а Џордан носел дрес со број 23, што се совпаѓа со годината 2023 во која тиквата стана светски шампион.
