Општина Аеродром поднела кривична пријава против Јавното претпријатие „Комунална хигиена“ – Скопје за загрозување на животната средина бидејќи десет дена не го собирало отпадот на повеќе локации во општината.
Поради ова, како што соопштија утрово од општината, работниците од нивното Јавно претпријатие за комунални дејности во изминатите три дена успеале да соберат 24 тони или 170 метри кубни отпад од домаќинствата во Аеродром, работа која, велат, не ја извршило градското комунално претпријатие.
Оттаму им се извинуваат на сите жители на општината за непријатностите и истовремено информираат дека за целата состојба Општината до Министерството за внатрешни работи (МВР) и Основното јавно обвинителство Скопје поднела кривична пријава против ЈП „Комунална хигиена“ – Скопје за загрозување на животната средина.
