Двајца вработени од Агенцијата за вработување заработиле кривични пријави откако се осомничени дека овозможиле нелегална работа за 87 странци со што државата е оштетена за околу 9.500 евра. Кривична пријава против Н.М.(48) од Скопје и В.З.(60) од Скопје поради постоење основи на сомнение за сторено кривично дело „злоупотреба на службена положба и овластување“ по член 353-а став 1 од Кривичниот законик.
Како што соопшти МВР пријавените, во периодот од 20.11.2020 до 22.01.2021, спротивно на член 13 став 1 точка 1,2,3,и 4 од Законот за вработување и работа на странци, изготвиле и издале 14 образци за пријава на работа на странци на територијата на Македонија на правно лице со што всушност легализирале нелегален престој и работа на вкупно 87 лица странски државјани.
–На тој начин му овозможиле на правното лице да избегне плаќање на давачки кон државата по основ на персонален данок на доход и плаќање на давачки за придонеси по основ на задолжително социјално осигурување во износ од 593.056 денари, за која сума правното лице прибавило противправна имотна корист и воедно за истиот износ пријавените предизвикале штета на буџетите на Фондовите на Македонија, се наведува во информацијата.
