Италија е прогласена за најдобра европска дестинација за „соло“ патувања во 2026 година, според индексот на компанијата „Мач бетер адвенчурс“. Рангирањето било направено врз основа на безбедноста, пристапноста на храната, инфраструктурата и условите за патување.
Според авторите на истражувањето, Италија нуди идеален спој на врвна гастрономија, развиен железнички сообраќај и разновидни природни предели, што ја прави особено привлечна за патници кои патуваат сами.
Во образложението се наведува дека земјата овозможува лесно движење и богато туристичко искуство – од планинарење на Доломити, велосипедски тури низ Тоскана, па сè до прошетки по крајбрежјето на Лигурија.
На второто место се најде Португалија, која е издвоена поради високото ниво на безбедност и добрата туристичка инфраструктура. Меѓу препорачаните дестинации се атлантскиот брег, Азорски Острови, како и помалку познатите рибарски патеки надвор од Лисабон и регионот Алгарве.
Третата позиција ѝ припадна на Шпанија, со препораки за кантабрискиот брег, Галиција и регионот Мурсија.
Во продолжение на листата се најдоа Норвешка, Словачка, Албанија, Исланд, Грција, Словенија и Романија. Норвешка се издвојува по безбедноста и природата, додека Албанија е посочена како атрактивна и ценовно пристапна дестинација.
Според коосновачот на компанијата, Сем Брус, во последните години сè повеќе луѓе избираат „соло“ патувања со цел да комбинираат чувство на сигурност, авантура и откривање нови места.
