Кривичен суд: Пресудата за убиството на младинецот во Н. Лисиче е донесена во непристрасна постапка

За кривичното дело „Убиство во миг“ од член 125 од Кривичниот законик, законодавецот, а не судот, предвидел казна во траење од 1 до 5 години затвор, соопшти денеска Основниот кривичен суд во Скопје. Соопштението доаѓа по реакциите во јавноста заради изречената казна од три години затвор за убиството во скопската населба Ново Лисиче во август минатата година. Во информацијата се наведува дека судот постапува врз основа на тежината на кривичното дело по обвинителен акт или обвинителен предлог добиен од Јавното обвинителствот за кривично дело квалифицирано од надлежен обвинител.

– Судот води непристрасна постапка во која доследно ги почитува правата на обвинетите, но и на оштетените, утврдува вина и одредува казна исклучиво врз основа на тежината на Кривичното дело за кое се терети обвинетиот, односно запретената казна за истиот. Со оглед да обвинетиот кој има 18 години и претходно не бил осудуван, Законот исто така утврдил олеснителни околоности кои судот мора да ги земе предвид, па токму затоа е одредена казна од 3 години затвор, се вели во соопштението од Основен кривичен суд Скопје.

Споредбата со друг предмет, посочуваат од Судот, за кривичното дело „Насилство“ каде е изречена казна затвор во траење од четири години е несоодветна бидејќи за тоа кривично дело, исто така законодавецот, а не судот, предвидел казна од 3 до 10 години.

– Со цел дел од граѓанте да не бидат доведена во заблуда околу надлежноста на судот и другите институции при решавањето на еден кривично – правен настан, како суд сме должни да ја запознаеме јавноста дека надлежни за квалификација на кривичните дела, според која квалификација се одредува казната – доколку се докаже вината, се МВР и Јавното обвинителсво, а не судот, стои во соопштението од Основен кривичен суд Скопје.

Претходна вестКазни за 620 лица, не носеле маски
Следна вестСвидетелствата се делат, колку од петките се заслужени, а колку подарени?