Најави за можна блокада на сообраќајниците во градот е упатена од денешниот протест на здравствените работници поради доцнењето на платите за јануари.
-Доколку до средна не се земе плата ние ќе го блокираме Скопје на влезот кај Ѓорче Петров и Автокоманда и ќе го блокираме Центар во четврток. Значи, најавуваме блокада на Скопје од Независниот синдикат и другите синдикални организации, најави денеска Лазар Костовски, претседател на Независен синдикат на геријатрија.
Претседателката на Независниот синдикат на ГОБ „8 септември“, д-р Рената Ѓаконовиќ рече дека има големо незадоволство.
– Луѓето немаат пари, кој ќе ги плаќа каматите, кредитите, сметките? Едноставно тука имаме луѓе кои работат за многу мала плата, рече таа.
Горан Ристески од овој Синдикат најави дека в петок ќе поднесат кривична пријава против лица одговорни за нефункционалноста на системот на Фондот за здравство.
-Кривична пријава ќе се поднесе поради непостапување. Во медиумите се пишува дека државата дала одредена сума за надградба и одржување на софтвер. Ние немаме корист од тоа, значи компаниите кои биле платени, имале за задача и да го одржуваат. Мора некој да понесе одговорност, таа услуга е платена согласно важечките стандарди, рече Ристески.
Претседателот на КСОМ, Марјан Ристевски рече дека не добиле повик од Владата за разговори иако имало официјален допис до премиерот Димитар Ковачевски.
– Владата се занимава само со себе, ја заборавија основната функција да се грижат за работниците. Здравствените работници прават натчовечки напори работејќи во лоши услови и за тоа уште да не бидат платени. Докторите се револтирани и апелираме да се даде што побрзо платата. Овие луѓе немаат земено К-15 дваесет години, рече Ристевски и додаде дека од ФЗО му најавиле дека до крајот на денот ќе успеат да го покренат системот за плати.