Научен труд за неолитскиот локалитет Влахо кај Живојно во Пелагонија на Центарот за истражување на предисторијата е објавен во престижното археолошко списание Антиквити (Antiquity) кое го издава Универзитетот во Кембриџ. Во трудот сумирани се последните сознанија за оваа неолитска населба која, според стручните лица, е мошне значајна за македонската и за европската археологија.
-Во трудот е истакнато присуството на десетина ровови, евидентирани на локалитетот Влахо преку неговото геофизичко скенирање. Резултатите од ова истражување посочуваат на дури тринаесет полукружни концентрични ровови што во моментов претставува единствена ваква појава во предисториска Европа. Во просторот што го опфаќаат овие ровови присутни се уште два паралелни рова што формираат правоаголна целина во која се присутни остатоци од повеќе неолитски градби. Надвор од овој мошне интересен комплекс, геофизичкото скенирање потврди уште два рова кои се формирани независно, а за кои во моментов не се знае дали се истовремени или, пак, направени подоцна, соопшти Центарот за истражување на предисторијата.
Она што е фасцинатно за овој локалитет, нагласува Центарот, е фактот дека тој е датиран во 64 век пред новата ера, што воедно го прави и еден од најстарите неолитски локалитети во Европа.
-Во таа смисла, доколку овие десетина полукружни ровови се изработени во раниот неолит, што е сугерирано од добиените дати и материјалната култура, тогаш тоа го прави овој локалитет исклучително важен поради неговата специфична просторна организација која не е вообичаена за Балканот, но и пошироко, наведува Центарот.
Издавањето на овој научен труд во реномираното списание, според Центарот за истражување на предисторијата, ќе му даде многу поголемо и светско афирмирање на локалитетот Влахо кај Живојно и на неговите хронолошки, просторни и културни обележја. Со самото тоа што трудот е рецензиран од врвни светски стручњаци, се додава во соопштението, ја потврдува веродостојноста на изложените резултати и овозможува нивно темелно вклучување во студиите на бројни истражувачи. На тој начин се истакнува и значењето на оваа мошне специфична неолитска населба и потребата за нејзино долгорочно проучување и заштита.
Центарот укажува дека локалитетот што е предмет на нивниот научен труд, Влахо кај Живојно во Пелагонија, во моментов е соочен со сериозно оштетување поради ископувањето јаглен во негова близина, но и во рамки на периферијата на неолитската населба.
-Несовесното однесување кон овој локалитет предизвикува оштетување на неговите периферни делови и особено на рововите кои претставуваат негово уникатно обележје. Поради тоа неопходна е итна заштита на ова наоѓалиште и многу погласно апелирање за негово целосно зачувување. Во таа смисла, публикувањето на најновите сознанија за овој уникатен локалитет ќе придонесе Влахо да биде препознаен на меѓународно ниво и да му се овозможи соодветен научен третман и заштита. Освен истакнати светски научници од кои дел се вклучени во истражувањето на Влахо, за неговата вредност и специфичност стануваат свесни и меѓународни организации кои ќе иницираат негова целосна заштита, соопшти Центарот за истражување на предисторијата.
