Четири новинарски имиња во последниот период од своите редакции си заминаа во државната администрација на позицијата на портпароли или одговорни во секторите за односот со јавноста на институциите. Прво беше обелоденет трансферот на новинарот на Македонската телевизија Душко Арсовски на позицијата портпарол на Владата а вчера се информираше за уште три трансфери.
Кети Гетева, новинарка и уредничка од Алфа ТВ, од вчера е ангажирана во Министерството за здравство, како одговорна на Секторот за односи со јавноста. Но, таа нема да дава изјави за медиумите туку тоа ќе продолжат да го прават министерот, директорите на клиниките, на центрите за јавно здравје и останатите здравствени установи. Новинар и уредник. Александар Видиновски од Канал 5 ТВ премина во Министерството за правда, на работно место портпарол и посебен советник за односи со јавноста на министерот Бојан Маричиќ.
Во Министерството за внатрешни работи, пак, се вработи Гоце Андреевски, кој на јавноста ѝ е познат како водител и новинар од Телма ТВ. Во последната недела тој неколку пати се појави со изјави пред логото на МВР.
Сите тие ја зголемија бројната листа на новинари, кои особено по избори нагрнуваат во многуте државни институции.
Значи, четири нововработени во државната администрација кои платите натаму ќе ги добиваат од државен буџет. А премиерот Зоран Заев упорно ветува дека ќе оствари намалување на гломазната државна администрација за цели 20 проценти. Ако продолжат со нови вработувањата можеби ветувањето ќе се смени и на крајот ќе се случи ново зголемување на административците за 20 проценти…
