Анализа на моменталната епидемиолошка состојба и евентуалните нови препораки ќе бидат тема на пладневната седница на Комисијата за заразни болести. Комисијата заседава во ситуација кога секојдневно има се поголем број на новозаразени лица од Ковид-19.
– Комисијата за заразни болести ќе се состане во 12 часот и на состанокот. Ќе се дискутира за епидемиолошката состојба или препораките ќе бидат донесени на утрешниот состанок, во форма на препораки или заклучоци и ќе бидат споделени веднаш по состанокот, изјави вчера за МИА д-р Злате Мехмедовиќ, портпарол на Комисијата.
Веќе неколку дена по ред, бројот на новозаразени е над 700, а само вчера од 1.774 тестови се регистрирани 792 нови случаи на Ковид-19. Речиси половина од новозаразените во Скопје. Бројот на активни случаи во моментов е 3.595.
Комисијата за заразни болести на последната седница не донесе дополнителни рестриктивни мерки. Остануваат да важат мерките за задолжително носење заштитна маска во јавниот превоз, здравствените установи, аптеките и установите за згрижување на возрасни лица и лица со попреченост.
Од Комисијата апелираат до граѓаните да внимаваат на сопственото здравје, да избегнуваат посети во затворени и непроветрени простории, освен кога тоа е неодложно. Во такви случаи се препорачува носење заштитна маска и одржување дистанца.
