Со симболичното враќање на клучот од градот на градоначалникот Петар Јанков, карневалџиите официјално ги затворија осумдневните карневалски свечености во Струмица.
Градот повторно живееше во духот на традицијата, маските и веселбата, а завршниот чин го означи враќањето на „власта“ во рацете на градоначалникот – обичај што го симболизира крајот на карневалското владеење.
„Струмичани уште еднаш покажаа дека се гостољубив народ и дека знаат да организираат врвна забава. Како градоначалник, сакам да им се заблагодарам на сите што придонесоа ова издание на карневалот да биде едно од најдобрите досега“, изјави Јанков.
Исполнети ветувања за добра забава
Претседателката на Организацискиот одбор на Струмичкиот карневал, Танкица Стојанова, истакна дека со враќањето на клучот симболично се заокружува уште едно успешно карневалско издание.
„Драго ми е што Струмица доби карневал каков што заслужува. Сите карневалџии беа тука со нас и се надевам дека следната година ќе ги имаме во уште поголем број“, рече Стојанова.
Традицијата продолжува
Пред финалниот чин, беше одржан традиционалниот Тримерски посен ручек, проследен со настап на „Распеани струмичани“. Овој обичај има длабоки корени во струмичката традиција.
Во минатото, ручекот го подготвувало семејството на армасаната (верената) девојка, во чест на гостинките што доаѓале заедно со идната свекрва. Со подароци и пеење еротски песни, тие симболично ја подготвувале идната невеста за брачниот живот.
Со овој чин, Струмица го затвори уште едно карневалско поглавје, оставајќи зад себе осум дена исполнети со традиција, музика и маскенбалска магија.
