ВМРО-ДПМНЕ: Шилегов ќе фрли 70 милиони евра, за 10 минути побрзо пристигнување од Ѓорче до Аеродром

Трамвајот на тркала нема да го реши сообраќајниот метеж во градот туку решението се две подземни сообраќајници, e став на советничката група на опозициската ВМРО-ДПМНЕ во Советот на Скопје. Таа реагира на вчерашното потпишување на кредит од 70 милиони евра со кој ќе се плати воведување на брзиот автобуски систем.

-Мрзливиот Шилегов ќе фрли 70 милиони евра, за 10 минути побрзо пристигнување од Ѓорче до Аеродром. БРТ не е решение и истиот ќе создаде и голем сообраќаен метеж. Проектот за БРТ кој е замислен да се протега од Лисиче до Ѓорче Петров ќе го уништи средишното зеленило на булеварите „Видое Смилевски – Бато“, „Јане Сандански“, „Кузман Јосифовски – Питу“, „Кочо Рацин“ и „Партизански одреди“, реагира советничката група.

Тие велат дека ќе се загрози и главната водоводна цевка која се наоѓа на 2 метри длабочина во средишната зона на „Партизанска“. Укажуваат и дека пристапот на патниците ќе биде потежок.

-Патниците ќе бидат принудени да поминуваат три ленти за да стигнат до автобуската постојка или при излегување од автобусот да го поминат булеварот, а не како сега директно од автобусот да се најдат на пешачка зона, со што се загрозува безбедноста во сообраќајот, но и се отвора потреба од пешачки натпатници, што е многу скапо, а нивното користење до сега се покажало како минимално од страна на граѓаните, посочуваат советниците

Тие потенцираат дека решението треба да се бара во две подземни сообраќајници.

-Едната од Влада до Комплекс банки која ќе го скрати патувањето за половина час од Аеродром до Карпош т.е. исток – запад и обратно. И втората позади Рамстор со иновативни кружи текови на две нивоа која комплетно го решава проблемот со сообраќајот од насока Карпош – Кисела Вода и обратно, се наведува во соопштението.