Семеен пример од кој се гледа каква е верската коегзистенција во Албанија изнел албанскиот премиер Еди Рама за време на синоќешниот настап во Вашингтон, САД. Тој одржа говор на Универзитетот Џорџтаун во Вашингтон, каде, меѓу другото, зборуваше и за своето семејство.
– Би сакал да го пренесам примерот на моето семејство. Јас сум католик, мојата сопруга муслиманка, нашите две повозрасни деца, од првите бракови, се православни. Ние имаме едно малечко детенце, што може да се реши да стане евреин, нему му останува да ја донесе одлуката. Го споменувам овој пример, бидејќи ова е наследството што го има Албанија, рече Рама.
Тој го спомнал примерот на албанските граѓани кои за време на Втората светска војна не дозволиле ниту еден нивен сограѓанин Евреин да биде однесен во злогласните логори, па до последниот пример на прифаќањето на Авганистанците, кои како што рекол може да останат колку што ќе посакаат „доколку сакаат и засекогаш“.
