Европската комисија го поздравува напредокот на земјите од Западен Балкан во однос на епидемиолошката состојба и вакцинацијата, но регионот се уште не е ставен на списокот на „безбедни“ земји, чии граѓани нема да бидат ограничувани при влез во ЕУ.
-Не сакаме да создадеме ситуација во која граѓаните на Западен Балкан ќе бидат третирани полошо отколку што дозволува здравствената состојба во регионот. Но, ЕУ не сака на кој било начин да го загрози напредокот што е постигнат во борбата против пандемијата и сето тоа со цел што побрзо да биде во ситуацијата за да може да се ослободи од сите ограничувања и сите да имаат можност да патуваат, изјави портпаролот на Комисијата, Аделбер Јанц.
На констатацијата на медиумите дека граѓаните на Западен Балкан се изолирани повеќе од една година и дека последните епидемиолошки податоци покажуваат дека земјите од регионот ги исполнуваат основните критериуми предложени од ЕК како услов за вклучување во список на „безбедни“ земји, од Комисијата велат дека ги разбираат очекувањата на граѓаните на Западен Балкан, но останува на земјите членки да донесат одлука за проширување на списокот, кој се ревидира на секои две недели.
Тој потсетува дека Комисијата препорача земјите членки да дозволат патување во ЕУ за сите патници што примиле вакцини одобрени од ЕМА и дека со тоа веќе е дозволено патување за голем број граѓани од Западен Балкан.