Економијата во Македонија е во стагнација. Со години. Ама со години политичарите и ветуваат дека ќе му се посветат на економското заздравување на државата.
Еве сега и мандатот за формирање на новата влада на лидерот на СДСМ Димитар Ковачевски го кажува истото: во фокусот ќе биде економијата.
-Новата Влада ќе стави силен фокус на економијата, насочени сме кон остварување двојно повисоки стапки на економскиот раст и покачувањето на платите. Ќе се насочиме кон ефикасна реализација на капиталните инвестиции и финансиска поддршка на граѓаните во време на економска и енергетска криза. Трудот на работникот мора да се цени и вреднува, најави деновиве Ковачевски.
Тој вчера најави и дека се работи на подготовка на нова програма која ќе биде фокусирана на економијата и на зголемување на ефикасноста во извршувањето на работите.
Ќе успее ли во намерата? Ваква намера и најава дека владата ќе биде фокусирана на економијата и на подобрување на животниот стандард на граѓаните се изнаслушавме и од неговиот претходник и ментор Зоран Заев. На пример лани по парламентарните избори кога го доби мандатот за формирање на владата, рече:
-Новата влада ќе работи на зголемен економски раст до 2024 година и подобрување на живеачката на граѓаните. Економскиот подобар живот на граѓаните е императив. Во изминатите три години успеавме покрај големите прашања, решавањето на проблемот со Грција, со Бугарија со членството во НАТО, меѓуетничките отворени прашања ги затворивме во државата и имавме искрена надеж дека после се, можеме сите овие придобивки да ги искористиме за подобар стандард, за подигање на плати на граѓаните, истакна Заев.
И?
Значи и тогаш и сега приоритет била економијата. А колку во тоа се успеало го чувствуваат граѓаните. БДП се уште не расте како што се проектира, мала е реализација на капиталните инвестиции, мали се странските инвестиции, просечната плата се уште не стаса до одамна ветените 500 евра, инфлацијата и енергетската криза се закануваат…
Не е познато, до сега, економија на една земја да се подигне само со ветувања.