Претседателскиот кандидат на Движењето ЗНАМ – За наша Македонија, Максим Димитриевски имаше свое обраќање пред граѓаните на Штип.
-Јас и ние од Движењето ЗНАМ – За наша Македонија се одваживме и тука на вас присутните, а и на секое домаќинство, ќе му кажеме дека не сме сите исти. Ќе кажеме дека граѓаните на Македонија заслужуваат поубаво утре, затоа што Македонија се празни. Младите немаат шанси, а оние што ја граделе државата гледаат како се распаѓа.
Ние од ЗНАМ нудиме нешто ново, што произлегува од граѓаните и ќе биде за граѓаните, рече претседателскиот кандидат Димитриевски.
Тој додаде дека ја бара поддршката за иден претседател на Македонија, затоа што ќе биде претседател на сите граѓани кој ќе биде одважен и секогаш за граѓаните и интересите на државата.
-Барам Македонија да гласа, за претседател другар, пијател, соборец, рече Максим.
Димитриевски посочи дека во државата има многу корупција и криминал.
-Имаме агенции, институции кои треба да се справуваат со неа, дополнително и Министерството за внатрешни работи, коешто најавува многу проекти, а за жал корупцијата од ден на ден расте. Затоа од позиција на Претседател на државата во првите 100 дена од добивањето на мандатот ќе предложам Национнална стратегија за борба против политичката корупција, бидејќи главната корупција е во политиката, или како што вели народот – рибата смрди во главата. Ќе се заложам таквите антикорупциски мерки да бидат дел и на следниот казнен законик, рече тој и додаде дека ако треба ќе се направат и уставни измени да се спречи било каква можност од било каква амнестија за сторено кривично дело злоупотреба на службена должост и овластување.
Тој рече дека неговата Програма има пет принципи и пет конкретни заложби со рокови, кои е сигурен дека ќе ги реализира, доколку го добие мандатот.
-Ние сме грст народ и доволно беше да се делиме. На Македонија и треба обединување и претседател обединувач и на Македонците и на сите етнички заедници во државата. Нашата заложба е Македонија да остане унитарна држава и никакви уцени нема да прифатиме, рече Димитриевски обраќајќи им се на штипјани.Тој им го честиташе празникот Рамазан Бајрам на граѓаните кои го слават и посака успех во секој дом.
