За уставни судии да бидат избрани лица кои не вршеле политичка функција седум години пред изборот, една е од новините во предлог-закон кој денеска во македонскиот парламент го достави опозициската партија Левица.
Димитар Апасиев, пратеник на Левица на денешната прес-конференција истакна дека овој предлог-закон на пленарна седница ќе се најде на 7-ми овој месец. Тој потенцира дека за првпат предлагаат предлог-закон за уставни судии каде што стриктно ќе се пополни правната празнина што досега постои во Уставот а тоа е, според нив, флоскулата истакнат правник.
-Предвидуваме претседателот да не може да предложи никаков друг правник освен универзитетски професор, поранешен омбудсман или негов заменик, поранешен републички јавен обвинител или адвокат со 20-годишно искуство во заштита на човековите слободи и права. Од страна на судскиот совет да не може да се предлагаат основни и апелациони судии, т.е. само врховни судии и судии кои суделе во меѓунардоно судство. Од страна на собраниската комисија за избори и именувања воведуваме неколку критериуми, да има завршени судии со просек 9, најмалку да биде магистер или доктор на науки, да има објавено релевантни книги или стручни трудови и да има само едно државјанствоа не две или повеќе државјанства, и да не вршел политичка функција седум години пред изборот, тоа значи да не може да биде поранешен министер, пратеник, генерален секретар и слично, рече Апасиев.
Левица предвидува јавен оглас за уставни судии, номинација за првпат од страна на правните факултети, кој што досега не постоеше. Се предвидува и подкомитет за селекција каде што во широк состав ќе учествуваат универзитетите, академијата, МАНУ, Интеруниверзитетската конференција и други релевантни субјекти и сослушување, односно интервју на кандидатите кој што ќе биде пренесувано во живо на телевизија.