Македонската кошаркарска репрезентација оствари значајна победа на домашен терен совладувајќи го Луксембург со 79-70, запишувајќи трет последователен триумф и дополнително зацврстувајќи се на врвот во својата квалификациска група. Нашите кошаркари уште еднаш го потврдија квалитетот, контролирајќи го натпреварот речиси во текот на сите 40 минути.
Избраниците на новиот селектор Берокал рано ја презедоа иницијативата и постепено создаваа резултатска предност, која на полувремето изнесуваше 44-32. Во продолжението Македонија го засили темпото и брзо дојде до убедлива разлика, поведувајќи со 51-34 по тројката на Андреј Магдевски, а потоа и со највисоки плус 20 по реализираните слободни фрлања на Адем Мекиќ.
До крајот домаќините рутински ја контролираа играта и не дозволија неизвесност, додека конечните 79-70 беа поставени по тројка на гостите во последните секунди.
Најефикасен во македонскиот состав беше Андреј Јакимовски со 17 поени, на кои додаде седум скока и четири асистенции. Хап забележа дабл-дабл учинок од 15 поени и 14 скока, додека Виктор Ефремовски натпреварот го заврши со 13 поени.
Победата воедно претставува и успешен почеток за селекторот Берокал, кој дебитираше со триумф и најави позитивен период за националниот тим.
