Вчера се вакцинирале 9.631 лица, од кои прва доза примиле 1.391. Досега се дадени вкупно 420.821 доза вакцини, но целосно вакцинирани со две дози се 168.284 граѓани.
Преку веб-платформата vakcinacija.mk се пријавиле 446.195 граѓани, соопшти Министерството за здравство.
Со последните бројки, 48 отсто од населението над 70 години, 42 отсто повозрасни од 65 години и 35 отсто над 60 години имаат примено барем една доза вакцина.
Масовна вакцинација се одвива во неколку градови во државата – во А1 СЦ „Борис Трајковски“ во Скопје и во спортските сали во Кавадарци, Куманово, Тетово, Штип, Битола, Струмица, Охрид, Велес и Прилеп.
Според денешната статистика, останува малата бројка на дневно вакцинирани, под 1.400 (со прва доза), а причините за тоа се немањето вакцини.
Здравствените власти од минатата недела најавуваат дека во овој месец ќе пристигнат над 100.000 „Фајзер“ и 500.000 „Синовак“, како и најавите за донации од Бугарија и Грција. Но до вчера единствено пристигнаа 30.000 дози „Синовак“ од Турција, кои властите во оваа земја ги ветија за време на неодамнешната посета на премиерот Зоран Заев на Анкара.
