Православните христијански верници денеска го празнуваат големиот празник Богојавление – Водици посветен на споменот на крштевањето на Исус Христос од страна на Јован Крстител во водите на реката Јордан. Славењето годинава ќе помине без собири на верниците на реките и езерата низ Македонија на кои што традиционално се вршеше и чинот на фрлање на крстот по кој скокаа стотици и стотици верници. До откажувањето дојде како резултат на потребата на почитување на превентивните мерки против корона вирусот и постигнатиот договор на МВР и на Македонската православна црква.
-Имавме состанок со МПЦ на кој што е договорено да не се одржи церемонијата за утрешното празнување на Водици. Апелирам да се почитуваат овие мерки, изјави вчера Оливер Спасовски, министер за внатрешни работи.
Прославата е откажана и во Охрид каде што последниве години имаше најголеми собирања на граѓани и учесници во скокањето по крстот. Дебарско-кичевската епархија повика да нема масовно собирање на верниците, а соопшти дека осветувањето на водите на Охридското езеро ќе се изврши во 11 часот. Во Скопската епархија изјавија дека нема да има фрлање на крстот во Вардар, а во црквите ќе се осветува богојављенска водичка. Оние верници кои ќе сакаат да си земат од оваа водичка можат да си дојдат во црква и да си земат од неа.
Инаку да потсетиме, Свети Јован Крстите чинот на крштевањето го извршил кога Исус Христос, Божјиот Син навршил триесет години од телесното раѓање и тргнал да го шири христијанството. Со тоа на овој празник му се дава значење на крштевањето како една од повеќето свети тајни на христијанството. Крштевањето значи и духовно раѓање, односно почеток на човековото живеење во верата. Штом се крстил и излегол од реката на Исус му се отвориле Небесата и Духот Божји во телесен вид како гулаб се спуштил над Него. Глас од Небесата говорел: “Овој е Мојот возљубен Син, Кој е по Мојата волја! “Гласот на Отецот е упатен кон Неговиот Син, но поради Него ги повикува сите луѓе од светот да станат синови и ќерки Божји.
Водици се празнува два дена. Првиот ден 19-ти јануари, освен Богојавление и Водици уште се вика и Војордање и Машки Водици, а вториот ден 20-ти јануари, Собир на Свети Јован Крстител уште се вика и Женски Водици.
Именден денеска празнуваат: Богдан, (значи даден од Бога) Богдана, Божана, Бојан, Бонка, Богомил (значи мил на Бога), Јордан, Данчо, Јорданка, Данка, Даница, Дарин, Јован, Јованка, Јонко, Јонка, Јоана…